Favang Issue
Dar 5 a pelh deuh hlek hnu chuan cinema hall, kan khuaa lian ber maiah chuan kan thu tlar tham a. Keini, Mizo 5 tih loh chu Vai vek an ni. Bollywood-ho film siam thar, 'Murder' tih chu kan en mek a. Vai tawng kawi khat pawh thiam lo chuan ka en ve tho a. Hindi film cinema hall-a kal meuha ka en vawi khatna a ni hial awm e.
Kan en chho zel a an chezia thlir chungin, thiante'n a chang changa an lo lehna nen chuan hmehbel chawpin ka en ve zel a. A film a tunlai, a sexy, a hmuhnawm ve tho mai. Tin, chumai bakah Bangkok-a chan a nih vangin hmel zo deuh deuh an tam a, a hmuhnawm riau.
Chutah Changtupa'n Changtunu bialpa a tawkzal a, a thi emaw atih a, a buai em em lai tak maiin, Mizo Tawng ngei maia tawng a lo ri chhuak ta! E! Kan cinema hall chhungah hian Mizo dang an awm ve elo? Ti chuan kan beng leh mit kan han len kual deuh a. A ni lo. Cinema a ni. An mahni pawh an lo lang nghal. Mizo an ni ngei mai. An tawng pawh Mizo. Engtin nge an lo lan ve ringawt a? Tih zawhna leh mak tihna chu ka-ah chuan a chhuak rual thawt hlawm a.
An Mizo tawng zawha an Sap tawng pawh Mizo awphawi dik tak! Uai! Bollywood film 'Murder' chu kha thil hlek khan a ti-Zo ta raih mai. A ngainatawm sawt! Engtin nge khatih laia Mizo leh kan tawng an lo hman kher kha ni ang le? I lo sawi zui teh ang u.
Pakhatna. Khata Mizo tlangval lo langte khan 'Bangkok mi kan ni', 'Thai kan ni' tiin an lo bum en ni ang? Nih awm loh tak. Bollywood ve rengruangah chuan thil chu an rel fel tawk turah chuan ngai i la.
Pahnihna. A film chan laklawh lai khan an lo kaltlang ve a, kan ti dawn em? Awihawm loh lutuk.
Pathumna. Khatia Mizo leh Mizo tawng kan hmuh a, kan hriat takah chuan, a film kha kan nelin, kan tlangnel ta sawt mai. A film kalphung leh zel hre turin HINDI thiam a chakawm sawt. 'Hindi thian ka va'n chak!'. Hindi thiam an intithei dawn tih a chiang reng.
Chu chu a ni lo em ni Pro-Hindutva policy? Chu chu a ni lo em ni 'Saffronization' chu? Ngaihtuah zui tur a tithui tlat! Hindi ngainep ber leh tei thei lo ber hnam tawng kher hi engatinge Hindi thehdarhtu pawl hian an hman talt le? Khatia kan tawng rei lo te a lo lan zeuh khan kha Hindi film kha kan lo nel ta em em mai a. Chu chuan a dawt chiaha a thlen chu Hindi film enna.
Ngaihtuah zui peihte tan chuan ngaihtuah zui tur a tam. HIndi luipui hi engtin nge Zotui thiang hian a fin tak ang le? Aw! Zoram, India hi nang aiin a lian a, i hneh loh HNU a nih hi aw!! Mahse, hnam dang hmusit mai lo la.